Жаңа пойыз төрт күнде бір қатынайды. Астанадан Атырауға дейінгі жол 22 сағат 57 минут, Атыраудан Астанаға дейінгі уақыт 22 сағат 15 минут. Пойыздың жаңа құрамы 27 вагоннан тұрады, оның 22-сі жолаушылар вагоны, 2-і «Гранд» санатты (екі орындық люкс), 2-і «Бизнес» санатты (екі орындық) және «Турист» санатты (төрт орындық) 18 жолаушы вагоны, сондай-ақ, 3 техникалық, 1 вагон-бар мен 1 мейрамхана вагоны. «Гранд» санатты вагонда мүмкіндігі шектеулі азаматтарға арналған бір купе қарастырылған.

Вагондар «Жолаушылар тасымалы» АҚ жылжымалы құрамының техникалық-ресурсын жаңарту және арттыру бағдарламасын жүзеге асыру аясында сатып алынған және соған сәйкес, 2014 жылға дейін тағы 420 жолаушылар вагоны сатып алынады.

Естеріңізге саламыз, бүгінгі таңда «Тұлпар-Тальго» вагондарынан құралған жүрдек пойыздар 5 маршрут бойынша: 2001-2003 жылдардан бастап «Алматы-Астана» бағытындағы №1/2, «Алматы-Шымкент» бағытындағы №25/26 пойыздары, 2012 жылдан бастап «Алматы-2 - Петропавл» бағытындағы №151/152 пойызы, «Ақтөбе-Астана» бағытындағы №88/87 пойызы қатынайды. Биылғы жылдың маусым айынан бастап, «Алматы-2 - Атырау» бағытындағы №77/78 жүрдек пойызы жолаушылар тасымалдайды.