Нұрғиса ЕЛЕУБЕКОВ (фото)
Қазан туғалы қымбат көлік мінгендер күндіз
күлкіден, түнде ұйқыдан айырылғандай. Көлік иелерін түнімен дөңбекшітіп
жүрген мәселе қозғалтқыш қуаты 3 мың текше сантиметрден (3.0) асатын
көліктің салығының көбеюі еді. Яғни ол көлік иелері бұрынғыдай ел
қатарлы аз-маз тиын-тебенмен салық төлеп құтылмайды. Кемінде көлігінің
салығына 60 мың теңгеден бастап 200 мың теңге шамасында төлеуі тиіс
болады. Ал қозғалтқышының қуаттылығы 3-тен жоғары 4-5-ті құрайтын
көліктеріңіз анау-мынау қарапайым адамның қолы жете бермейтін
жылтылдаған «джиптер» екені және анық. Ал ондай темір тұлпарларды
тақымға басқандар бай-манаптар екені тағы даусыз. Сөйте тұра, қымбат
көлік алуды қалтасы көтергендер салық төлеуге келгенде қалтырайтын
секілді. Республикалық БАҚ-тарда бүгіннің өзінде салықтан жалтарып,
түрлі амал-шарғы жасалып жатқаны ашық айтыла бастады.
Сонымен... Заң жобасында қозғалтқышы 3 мың текше сантиметрді құрайтын
көлік салығы артатыны айтылды. Нақты айтқанда, көлемі 3-тен 3,2 л-ге
дейінгі көлік жарнасы 35 АЕК, 3,2-ден 3,5 л-ге дейін – 46 АЕК, 3,5-тен 4
л-ге дейін – 66 АЕК-ке дейін өседі. Онымен қоса, халық қалаулылары
қозғалтқыш көлемі 4 л-ден жоғары көліктер үшін де 4-тен 5 л-ге дейін
–130 АЕК-ке дейін, 5 л-ден жоғары – 200 АЕК-ке дейін салықты көбейтуді
де ұсынып отыр. Салықтың жаңа жарналары 2014 жылдың 1 қаңтарынан бастап
сатып алынған көліктерге қолданылады. Айтпақшы, өзгертулерге сәйкес,
Ұлы Отан соғысының ардагерлері мен оларға теңестірілген тұлғалар үшін
қозғалтқышы 4 л-ден жоғары көліктерге қарастырылған жеңілдіктер алынып
тасталған-ды. Мұндағы мақсат – салықтан жалтарғандарға тосқауыл қою. Бұл
уәж – экономика және бюджеттiк жоспарлау министрi Ерболат Досаевтыкі.
«Көлiк салығына жасалатын жеңiлдiктi алып тастау арқылы салықтан
жалтаруды тоқтатуға болады. Әйтпесе, қымбат көлiктерiн зейнеткерлер мен
мүгедектердiң атына аударып қоятындар көп. Нәтижесiнде, бюджетке 1,7
миллиард теңге қосымша құйылады», – деген-ді министр Е. Досаев. Алайда
адамнан айла артылған ба? Жоғарыда айтқанымыздай, қазірдің өзінде-ақ
көлігінің қозғалтқыш қуаттылығын кемітіп жатқандар да жоқ емес.
«Заң жобасында қарастырылған қозғалтқышы 3 мыңнан 4 мың текше
сантиметрге дейінгі көлік құралдарына салық мөлшерлемесін көтеру
мәселесін қолдай отырып, өз ұсыныстарымызды да алға тартамыз. Атап
айтқанда, қозғалтқыш көлемі 4 мыңнан 5 мың текше сантиметрге дейінгі
көлік құралдарына салық мөлшері 130 айлық есептік көрсеткішке дейін
белгіленуі керек, ал қозғалтқыш көлемі 5 мың текше сантиметрден асатын
көлік үшін салық 200 айлық есептік көрсеткішке тең болуы қажет. Сонымен
қатар еліміздің қарапайым азаматтарының мүдделерін кемсітпеу үшін
қарастырылып отырған барлық салықтық ставкаларды 2014 жылдың 1
қаңтарынан бастап алынған автокөліктерге салуды ұсынамыз. Яғни осы
уақытқа дейін иеленген автокөліктерге ескі салық мөлшерлемесі сақталуы
керек», – деген болатын Мәжіліс төрағасы, «Нұр Отан» ХДП фракция
жетекшісі Нұрлан Нығматулин.
Жалпы, бұл салық мәселесі ел ішінде қызу пікірталас тудырып тұр. Пікір
қақ жарылды. Біреу жақтаса, екінші тарап даттағаны да рас. Жаңа
жылдан бастап жаңа көліктерге қозғалтқыш қуаттылығына қарай салықтың
көтерілуі бұл істе де заңға қайшы әрекеттердің бой көрсетуі мүмкіндігін
жоққа шығармайды.
Сәлижан САДЫҚОВ, заңгер:
– Қозғалтқыш қуаттылығы 3 мың текше сантиметрден асатын көліктері барлар
да, одан жоғары 4-5 қуаттылығы бар көлік иелеріне де жаңа салық
бойынша ең азы 60 мың, көбі 200 мыңнан астам төлеуге тура келеді.
Әрине, бұл аз ақша емес. Сондықтан да көлік иелерінің бәрі бірдей
болмаса да, көпшілігі салықтан жалтарудың амалын қарастыратыны сөзсіз.
Сондықтан да бұл салық төлеу күшіне енген күнде де оның заңбұзушылықтан
ада болуы жіті қадағалануы тиіс.
Осы арада есіңізге дағдарыс жылдарында Францияның миллардерлерінің
«бізге салықты көтеріңіздер» деп Үкіметтеріне үкілеп хат жазғаны түседі
екен. Елдің экономикалық дағдарысқа тап келгенін көрген француздың
байшыкештері «салықты бізден көбірек алыңыздар» деп өтініш тастағаны
мәлім. Оны Еуропаның басқа жұрттарындағы бай-бағландар да, АҚШ-тың
алпауыттары да қолдап, қуаттап ала жөнелген-ді. Ал бізде, керісінше.
Көлігінің салығын жауып жасырған байлардың Шық бермес Шығайбайдан несі
артық?!
Қуан МАХАШЕВ, салық инспекторы:
– Қазіргі нарықтық экономика жағдайында халықтың әлеуметтік және
экономикалық негізде бір-бірінен мүліктік жағынан алшақтай түскен
ауқатты топтарына прогресшіл салықтар жүйесін енгізу қажет екені
белгілі. Бұдан кейінгі мәселе – қатаң бақылау орнату. Ондай бақылау
әкімшілік тұрғыдан күш қолдану арқылы емес, қайта осы заманға нарықтық
құралдардың, атап айтқанда, валюталық қаржылар мен
экспорттық-импорттық операциялардың қозғалысына бақылау орнату болуы
керек. Автор: Қызғалдақ АЙТЖАНОВА, Қарағанды Дереккөз: Алаш айнасы.
|