АСТАНА. 13 қараша. BAQ.KZ –Қазақстандағы кез-келген ұлттық
компанияларда, тіпті атқарушы органдардағы жалақы судья жалақысынан
жоғары. Бұл туралы бүгін ҚР Президенті жанындағы Орталық коммуникациялар
қызметінде өткен брифингте ҚР Судьялар кеңесінің төрағасы Анатолий
Смолин мәлім етті.
«Менің білуімше, соңғы 10 жыл
бойына ең жоғары жалақыны судьялар алады деп айтылып келеді. Алайда,
бұл жөнінде біздің төраға Қайрат Мәми «осыдан 10 жыл бұрын бұл көрсеткіш
шынымен де жоғары саналған шығар» деп дұрыс айтады. Қазіргі уақытта кез
келген ұлттық компаниялардағы, тіпті атқарушы органдардағы жалақының
судья жалақысына қарағанда әлдеқайда жоғары екендігін сенімді түрде айта
аламын», - деді А. Смолин. Сонымен қатар, кеңес төрағасы елімізде
судьялар санын арттыру қажеттілігіне де назар аударды. «Өйткені, қаралып
жатқан істер саны жылына 10 пайызға дейін артып келеді. Сондықтан да
еліміздегі судьяларға көп ауыртпашылық түсіп отыр», - деді ол.