«Шын» сайты бұған дейін де елімізге Ресей тарапынан төнетін сепаратистік қауіп туралы бірнеше рет жазған болатын. Әрине, біздің айтқанымызды құлағына қыстырып тиісті қорытынды шығарып жатқан кім бар? Өкінішті. Есесіне орыстар біздің өтірік айтып жатпағанымызды өздері-ақ дәлелдеп беруде. Ақыры Ресей билігі жең ішіне тыққан жұдырығы бар екенін оппозициялық саясатшы Эдуард Лимоновқа ашық айтқызды. Ол көкауыз не дейді? «Тарихи қателіктен Қазақстанның аумағы болып кеткен солтүстік облыстарды басып алайық» дейді. Ол үшін тек Елбасының биліктен кеуін күту керек екен. Сол кезде бас салу керек деп отыр. Кетпесе өзіміз кетіреміз деген ымын да сездік.

Әдетте, орыстар бастарына тышса да үндемейтін Сыртқы істер министрлігі дереу Ресейлік әріптестеріне нота жолдап, Лимоновтың мәлімдемесін түсіндіруді талап етіпті. Олар не десін. «Лимонов бір жүрген жынды, өзі оппозицияда, оның сөзі біздің ресми ұстанымыз емес» деп алдаусырата салады. Оған тіпті жаза да қолданбайды.

Орыс ойнаса да ойлап айтады. Қолымызды қусырып отыра береміз бе, әлде еліміздің іргесін бекітіп, орыс сепаратизмі етек алуы мүмкін өңірлерде қауіпсіздік шараларын күшейтеміз бе?

Бала күнімізде қыңқылдай қалсақ үлкендер «жылама, орыс келіп қалады» деп қорқытушы еді. Ал, орыс келе жатыр. Енді не істейміз?

«Шын-ақпарат»