Қажылыққа баратын денсаулығы нашар қазақстандықтарға коронавирусқа шалдығу қаупіне орай ескерту жасалды.

Денсаулық сақтау министрлігі санитарлық-эпидемиологиялық қадағалау комитетінің төрағасы, бас мемлекеттік санитарлық дәрігер Жандарбек Бекшин осы ауруға байланысты Сауд Арабиясындағы жағдайдың күрделі екендігін мәлімдеді.

Бұл туралы хабарлаған Tengrinews.kz сайты мәліметінше, Бекшин осы туралы діни басқармаға ескертілгенін айтқан.

"Сауд Арабиясында 77 адамнан коронавирус анықталып, оның 44-і қайтыс болған" деген Бекшин.

Оның айтуынша, иммунитеті әлсіз, жасы ұлғайған, қант диабеті тәрізді созылмалы дерттерге шалдыққан адамдардың Сауд Арабиясына сапардан сақтанғаны жөн.

"Жолға шығардан бұрын учаскелік дәрігермен кеңесіп алған дұрыс" дейді маман.

Бұдан алдын коронавирусқа байланысты биыл қажылыққа баратындар саны 20 пайызға қысқаруы мүмкін екені хабарланған еді. Жаңа вирус қажылыққа баратындарды біраздан бері алаңдатып келеді.