Бүгін Қытайдың Ганьсу провинциясында болған қос жер сілкінісінен 56 адам көз жұмып, 300-і жараланған. Мұнда жергілікті уақыт бойынша таңғы 8-дер шамасында болған зілзала апаттан кейін 1 жарым сағаттан соң күші 5 жарым балдық екінші жер сілкінісі тіркелді.

Бұл туралы Синьхуа агенттігі хабарлады. Зілзала салдарынан таулы аймақта орналасқан 8 қалада су тасқыны мен лай көшкіні басталды. Бұл аймақтарда электр жарығы мен ұялы байланыс жоқ. Осыған орай билік өкілдері 360 ғимараттың жермен жексен болып, 5 жарым мың баспананың зақымдалғанын айтты. Қазір төтенше жағдай қызметі мен құтқарушылар оқиға орнында жұмыстарын жалғастыруда.