Астана.
2 наурыз. Baq.kz – Ақ үй жұма күні АҚШ президенті Барак Обаманың Ресей
президенті Владимир Путинмен жарты сағат телефонмен сөйлескенін
хабарлады.
Ресми мәлімдемесінде Обама "Ресей Украинаның аумақтық тұтастығы мен егемендігін бұзды" деп мәлімдеді.
Обама
"АҚШ Ресейдің Украина территориясына әскер кіргізуін" айыптады. АҚШ
Ресейді Украинадағы жағдайды ушықтырмауға, әскерін Қырымдағы базасына
қайтаруға, Украинаның ішкі ісіне араласпауға шақырды.
Путин Обамаға "Мәскеудің Украинадағы мүддесі мен орыстілді тұрғындарды қорғау құқығы бар" екенін ескерткен.
Барак
Обама Владимир Путинге "Ресей Украинадағы этникалық азшылық құқығына
алаңдаса, ондай мәселелер бейбіт түрде, ЕҚЫҰ (Еуропадағы қауіпсіздік
және ынтымақтастық ұйымы) сияқты халықаралық ұйымдардың аясындағы
келіссөздер арқылы шешілуі қажет екенін" айтқан.
Обама
"Ресейдің Украина егемендігін бұзуы оның халықаралық беделіне нұқсан
келтіретінін" ескерткен. АҚШ Сочиде (Ресей) өтетін "Үлкен сегіздік"
саммитіне қатысуға дайындық шараларын уақытша тоқтатты.
АҚШ президенті Обама "Украинаға жедел қаржылық және техникалық жәрдем беруге" бұйрық етті.